2015年10月26日：29w2 終於頂唔順睇西醫

孕期由廿幾至三十週，應該係我最辛苦既時期！因為被妊娠濕疹令我真係好辛苦，日日都勁痕，又唔R得！當我同左Cammy呻之後，佢話我做乜唔一早睇醫生，做乜要自己咁辛苦！我諗：e，又係禾，橫掂都係，點解唔去睇下呢？結果當晚就去返搵家庭醫生，開左微量類固醇俾我，當然啦，我冇勁搽，不過我發覺都要對自己好D，唔好再忍得咁慘，一有少少痕就搽下，搽完先算啦！亦都好好彩，隨住我認真戒口，我發覺真係痕少左好多，極其量都係乾，我終於恢復返搽油保濕，諗返成兩個月都無搽妊娠紋膏都未爆紋，真係好好彩！

2015年10月15日：27w5 妊娠濕疹

不經不覺，同痕癢已經搏鬥超過兩星期！不論日夜，工作定訓著，都可以無啦啦爆痕！愈抓愈痕，愈痕愈抓，真係生不如死！阿仔，點解你要咁折磨我呢⋯⋯？唯有搽下蘆薈同家人俾我既潤膚露先至舒緩到少少。中醫話係我血熱有胎毒，西醫話荷爾蒙影響，搽乜都無用，真係灰爆！

琴日同老公去左玩具反斗城，又要湊夠數換贈品，所以我揀左副有狗狗既lego俾bach仔，希望將來鍾意啦！

2015年9月30日：25w5 妊娠痕

持續了好幾星期的肚痕，一點也沒有舒緩之餘，還愈來愈厲害，肚皮一片紅，一片紫，上網查過，應該是妊娠濕疹...人說要生完才沒事，而我最最最擔心的是會不會令Bach仔也有濕疹，這是我最不想見到的事....

看見這樣這樣的肚皮，想像產後的後遺症，雖然心裡早有準備，但一想起懷孕前無垢的身體，便有點空虛，有點迷失，好端端的，究竟為何要生孩子呢？他可以給你甚麼呢？他帶來的，就是浪費金錢，令你壓力大增，消耗你休息時間嗎？對於我這種自私的想法的人，思想真不要得！但我動搖了，但又無退路，我只恨我仍孩子氣，沒有做父母的堅強！孩子啊，你將會怎樣呢？你在我手中，會幸福嗎？

2015年9月10日：22w5 肚痕...

琴晚好得意，訓上床後，Bach仔踢得好大力，個肚一大舊彈上來！老公都摸到！之後老公一叫Bach仔個名，又踢喇！好可愛！

呢個星期開始，我肚臍開始痕，肚皮一點點，不過我都好忍得，唔去r佢！琴日又去左睇中醫調理，中醫讚我無之前咁熱，嘴生返皮，指甲無咁紫，所以執多左幾日藥，我要繼續努力！

不過最慘，就係...我痔瘡發作！坐低起身都勁痛，好辛苦！唯有等下，睇下會唔會好點...

2015年8月24日：20w2 照結構

月終於等到今日去照結構了！自從流啡之後，一路都好擔心Bach仔會唔會有事，完全放心唔落，真係人都癲！

一早首先去左牙醫度換鐵線，我決定生左先至諗再拔埋下排兩隻牙。醫生都理解，所以生之前，佢都話只會幫我洗下牙，繼續換鐵線，唔搞movement。

下午三點幾，搵埋老公去劉子建醫生度，上到去等左陣就入醫生房喇！同上次一樣，劉醫生好溫柔，問我呢排點呀，又講返nifty個報告係低危，又提返我bb係仔定女呀？有無感受到胎動呀？我答返有，因為由18-19週開始，我已經感覺到個肚彈下彈下，我好肯定呢d就係胎動啦！

講返照結構，醫生一開波已經搵到Bach仔大脾中間條大啫啫！哈哈哈！

之後一路逐個部位照，醫生照得好熟手，解釋得好詳細，每個部位都肯定我都見到先照下一樣。雖然有些部分其實我只係睇到一舊野，不過我都好信任醫生！期間都一路有幫bb check size，其實都好犀利，我無咩食特別野，size都全部正常！最開心就係醫生開左4d照Bach仔個樣俾我睇！好清！cap左兩張，Bach仔已經郁來郁去，郁到想cap多張都唔得！不過第一次可以見到Bach仔個樣，我已經非常開心！！我仲即時望下老公，佢傻更更咁望住個mon，但我知佢同我一樣，都係好開心的！

一路照，姑娘一路睇住checklist睇下有無漏。最後劉醫生話暫時咁睇都未發現到有問題，所有野都算正常！不過話始終只係超聲波，都有些限制，我都明白的！點都好，聽到已經安心左好多！

2015年8月23日：20w1 海洋公園

今次大住肚去海洋公園真係好經典！

話說我正日生日果日因為係香港史上最熱，好似有成35,6度，驚中暑就放棄去海洋公園！後尾同事同我講，今年8月因為係果兩隻熊貓生日，所以成個8月都有生日優惠！YEAH！所以就係8月最後一個星期去左喇！

天真既我，以為雖然頂住個肚，但我都係去行下姐，唔玩機動遊戲咪得囉！點知就大鑊喇！

果日我同老公都係HEA住入去，又塞下車咁，最終成3點幾4點先入到去，接近傍晚，好鬼多人，特別勁多大陸佬！我地都係主力睇下雀呀，金魚呀，熊貓呀，一開始都無乜野，但因為入任何一個館都要排隊，去下一個點又要行行行，結果坐海洋列車落左車其實已經累到痴線，坐低休息左幾個字都未回到氣！之後睇下企鵝果D，老公就同我去左冰極餐廳食晚飯！可以同企鵝一齊食飯真係好開心（雖然隔好遠），D野食又好好食禾！不過愈坐愈凍，食完出到門口我地兩個都變左雪條！之後諗住最後衝剌睇埋北極熊同雪狐，真係凍到PK，入左去望左兩眼就頂唔順出返黎！

之後入夜，排隊搭海洋列車條隊長到阿媽都唔認得，等左勁耐，落返山，我點都要揀返幾隻毛公仔先肯走！哈哈哈！再行去等巴士，已經累到嘔，捱到去金鐘地鐵站，我真係好辛苦，企都企唔到咁滯，果刻係FEEL到個肚好似就跌落黎咁，我要用手托住先企到，幾誇張！好彩好快有個位坐，不過坐左都無咩好轉，仲係好辛苦！果刻我覺得自己隨時會暈！好難先捱到返屋企樓下，咁橋阿媽打黎問我呢幾日點，我話我剛剛去左海洋公園，好累好辛苦，佢即刻鬧爆我痴線！有左去乜鬼！我都知衰啦！結果返到屋企，我真係無力啦，要攤係梳化足足個幾鍾先有力行去沖涼，我仲叫老公擔張櫈入去俾我坐係度沖涼！

2015年8月20日：19w5 情緒失控

D人成日話大肚婆會無啦啦發脾氣或者抑鬱，本身我都唔係好信，不過今日信喇！

話說今個星期連續幾日老公夜晚都出左去同公司同事或朋友出去食飯飲野，我訓著都未返，比著以前我不知幾歡迎，因為唔洗同我爭電視，爭廁所！但真係唔知做乜，當今日我聽到佢話又要同朋友去食飯飲野時，我真係好唔高興，我係覺得自己好孤獨，無人理，好委屈！（識我既人都知我平時最鍾意一個人活動）點解我老公唔理我！我唔要自己一個訓！（我不嬲係勁鍾意一個人訓，可以霸哂成張床！！）講下講下，真係好奇怪，D眼淚就自己標出黎，佢都知驚喇，以為我呻下，點知真係堅喊！果下我淨係想老公係我身邊！

到最後，其實我唔記得佢果晚有無出到去，我只係覺得，原來大肚婆情緒，真係控制唔到嫁。

2015年8月7日：17w6 BB展

結婚前一日，老公就自己同朋友去左BB展，後尾聽返我無去係完全正確，因為我未見肚，果度D人又係痴線既，BB車呀乜車都橫衝直撞！事前已經聽朋友講，PRINT定一堆LABEL去，我嫌LABEL紙貴，最後淨係用A4紙PRINT，都得！

老公真係好好，行足成日之餘，一日托左勁多野返黎，除左好多贈品之外，沖涼盤，紗巾，濕紙巾，包被，奶樽呀乜乜物物總之佢個推介果D佢都買左返黎，條街仲要鬼咁熱，真係辛苦哂！

2015年8月3日：17w2 胎心機

原來流啡入一入醫院，真係對我影響好大，就算靜養完，都係好擔心，好驚BB唔知會唔會突然無左！（因為仲未感覺到有胎動）有晚仲忍唔住打俾阿媽狂喊，阿媽都叫我不如返娘家住一排啦，不過我一諗起D龜龜無人照顧就放棄左，唯有叫自己唔好亂諗野！（後尾11月阿媽同我講返，原來佢知道我咁都好擔心，仲幫我去左黃大仙，感動！）

我都有同Tammy呻，佢真係好好，仲送左部全新既胎心機俾我！真係好感激佢，真係打後幾個月我幾乎日日都有用部機聽BB心跳！果日中午佢黎左CWB俾機我，我一拎完，就即刻是但買左D蘆薈GEL，係公司廁所度試用，部機都好易用，好快我就搵到BB心跳，安樂哂！

2015年7月29日：16w4 中醫安胎

自從流啡出左院之後，拎左一個星期假在家訓床，雖然暫時無咩事，不過都係勁擔心，Cammy叫我可以試下食中藥安胎，所以即刻去左睇中醫喇！

中醫除左話會開藥俾我安胎之外，一睇我唇色呀，指甲色已經話我燥熱到不得了！叫我唔好再飲老火湯，得閒食下涼野（西瓜都得！）或者我鍾意食既野（公仔麵都得！），佢話如果唔係，你又辛苦，又會影響BB！嘩我聽完之後不知幾鬼興奮，唔理老公同阿媽既反對，拿拿聲去斬邊西瓜同買10包公仔麵返屋企！當然啦，西瓜我都係切少少姐。另外又買左菊花沖水飲，真係飲落舒服好多！

講返安胎藥，我都有上網CHECK下D成份，飲左幾劑（煲藥），起碼無咩奇怪野，同埋發覺D分泌都真係小左，我諗真係有效！之後一兩個月我都有KEEP住執藥清熱毒，每次都時好時壞啦，到最後我發覺自己其實戒甜野同飲大量水係幾WORK的！

2015年7月25日：15w7 出院

住左一晚醫院，清晨唔知幾點就有姑娘走過黎幫我聽BB心跳，果下我仲訓到隻豬咁，差D唔記得左我琴日係幾咁擔心，是但拿起件衫俾佢聽，聽到噗噗噗聲之後，我又再訓。

食完早餐，訓。等等下，又見返到好PRO既女醫生黎巡房，佢好犀利認得我，仲同我講：唔好意思呀，琴日整到你咁唔舒服，因為一般六七月都好多新畢業既醫生，你記住係咁就得喇！我心諗：明哂！我再問佢：其實我出左院可唔可以去睇下中醫呀？佢話：都係睇個人決定，我自己都BUY中醫既，我自己都有睇開中醫，咁當然西醫角度就無呢樣野啦！我聽完，都明哂！再食埋個午餐，就等出院了～

2015年7月24日：15w6 流啡

今日係星期六，一早起身諗住返工，點知一去廁所，抹到大約好似半個掌心咁大攤既啡紅色血！！！大驚即刻入房同老公（果時仲係男朋友）講，佢即刻彈左起身話叫我去急症室，我話：不如返左工先，下午先去啦，佢鬧我痴線，所以我打完電話告假後，兩個人九秒九換左衫就落街截的士！

上左的士，我先至識驚，擔心到眼淚係咁流，好驚BB會無左，亦無諗過三個月後仲會發生呢樣野（真係無知！），睇得出老公都勁擔心，總之兩條友都苦瓜乾咁。

到左東區急症室，我已經喊到講唔到野，老公就幫我分流同交錢，話我係懷孕期流啡。我個CASE係極緊急，所以好快好快就聽到叫我個名，我雖然戴住口罩，平時好寸嘴既分流姑娘見到我咁，都變返個天使，好溫柔咁安慰我：唔好咁擔心，你喊都幫唔到BB嫁！冷靜D先！一聽到，我喊得更勁，之後姑娘就叫左入去坐低等。

雖然晨咁早，都有好多緊急既病人，好似有流緊鼻血既賓賓，坐左響床既女人，又有D阿伯。不過我已經無哂心機，眼淚鼻涕一齊標，又無帶紙巾，唯有呆等。等左都幾個字，之後終於可以見醫生喇！

個後生女醫生問左我一堆問題，例如堆啡係幾大攤嫁？有無見到有組織流出黎啊？之後就安排我上床聽BB心跳，如醫生拎左個手提既心胎心機，搵左一輪，終於聽到BB心跳：噗噗噗！果下真係鬆哂，不過仲係驚魂未定，我再問醫生：咁係咪即係無事嫁啦？醫生話：因為呢度始終係急症室，詳細既婦科檢查要去返婦科果邊！我會安排你住院再觀察下，我心諗：都好既，又可以CHECK真D，順便可以休息下！

搞左一輪，急症室就安排我上婦科病房，阿姐仲問我洗唔洗坐輪椅上去，我話：下，唔洗啦！就同老公搞入院手續喇！

上到婦科，果時已經係十點幾，響張床度等等下，先發現餓到傻，又未有飯食，老公就去左買通心粉俾我做早餐喇！期間見到隔離床個女人原來等緊做刮宮手術，聽到我心都寒！

之後食食下早餐，已經俾姑娘叫左我去第二個病房，又抽血又盛，之後老公就陪我去見第二個醫生！果個肥仔醫生睇個款應該仲細過我，已經好懷疑，不過心諗又唔應該咁狗以貌取人！跟住條肥仔問左我一大輪問題，最後一次幾時黎M，第一次驗孕幾時，幾時第一次去拎驗孕證明呀，幾時登記產檢呀XYZ，有D問題我真係唔記得幾月幾日，就死都要我答，我心諗：下，我第一次黎東區登記已經講過哂，之前醫生都問過啦，應該有RECORD嫁禾，我邊記得咁鬼多呀！同佢搏鬥完一輪終於答完，之後就話要CHECK下陰道口有無開到（果時仲未識驚，一味話好），等阿姐準備時，最搞笑係條肥仔好似同FRIEND咁撩我傾計：其實唔知點解好多人都係咁（流啡），又真係唔知原因係乜嫁禾！我唯有答：ER...係啦。我心諗：大佬，好似我係病人，頭先朝早先擔心到五顏六色炸禾！呢條肥仔真係好鬼膠！

好喇，之後條肥仔幫我做鴨嘴拑檢查，真係惡夢！首先我坐左左響張床上面，係佢面前打開腳，佢就塞左個勁大舊既鴨嘴拑落我下面，再撐大！痛到我面容扭曲，我忍唔住叫左出黎，好想死！整完一次，心諗完喇卦？之後隔一陣再有個明顯PRO好多既女醫生入黎，同個肥仔唔知UP左乜，因為好多醫療用字，我聽唔明，但就肯定女醫生好似係度教佢：嗱，其實你下次唔洗XXX嫁，XXX就得嫁啦！我心諗：頂你個肺，死肥仔，原來你頭先唔識嫁？之後女醫生就好溫柔咁同我講：唔好意思呀，頭先我知道係整到你好唔舒服嫁，不過我要再睇多一次！我心諗：下，唔係呀？不過都無計啦，你話點都要嫁啦！

個女醫生就明顯堅好多，唔係就咁隊入去，一路隊都會一路安慰我：係會有唔舒服，不過唔洗擔心，係唔會傷害到BB嫁！我即刻GUR哂，心諗：死肥仔，好心你學下野啦！到拎返個拑出黎，都見到仲有D啡色野同水流出來，女醫生話：子宮頸口無開到，果D分泌都係正常既，暫時都正常！不過我果時我俾人整左兩野，已經無乜心機，淨係好想快D離開果間房，同埋唔想再見到條肥仔呀！

之後拎埋醫院衫，正式入院，我就叫左老公返屋企執D日用品夜晚拎俾我！佢見無野可以做，就一條友去左動漫節買LEGO喇！

玩完個鴨嘴拑，等左一輪，又去左見另一個PRO既男醫生，佢話因為我而家都係懷孕初期，會同我照陰道超聲波，一開始我都有少少擔心，因為上網睇話有人做完之後會流血繼而B都無埋！我都選擇相信醫生，結果陰超係完全無唔舒服（相比起鴨嘴拑簡直係小兒科！）係超聲波我終於又見到BB喇！仲見到佢郁下郁下，真係安心哂！衰仔你真係嚇鬼C我啦！醫生都話心跳正常，不過流啡呢D野真係好難講係咩特別原因，唯有係再觀察！我問醫生見唔見到係仔定女呀？佢笑住話：咁早未睇到嫁，睇到都未必準！最後，佢仲PRINT左張超聲波相俾我做紀念，因為影到BB隻手仔同五隻手指，幾鬼SWEET！

至於我張床係正窗隔離，果日又落雨，外面一片白朦朦，隔離床係一個鬼婆，成間房都仲有四五個女病人倒，不過我無理咁多啦，一味狂訓覺！

到左傍晚，老公同阿媽黎左探我，老公仲買左麵包我食，之後奶奶都都有拎湯黎。基本上係無乜野做，全日就係間唔中有姑娘過下黎CHECK野，派下飯，其餘時間就狂訓覺，訓到我腰都痛，哈哈！

2015年7月9日：13w5 NIFTY結果&買衫仔

本來以為NIFTY結果要等兩星期，點知幾日後，診所姑娘就打俾我，話結果出左！收到電話果下真係超緊張！佢話基因無發現有異常（其實我無咩心機聽），之後佢話性別方面呢，因為染色體個數係細過唔知幾多，所以係男仔！我再問多次，係男仔？姑娘話：係呀，因為個數係XXX，所以有99.X%係男仔，果下個心開心到痴線！再CHECK埋EMAIL俾我果份報告，安心哂！

之後梗係第一次時間話俾老公知，當佢知道之後，隔住個WHATSAPP我都估佢開心到傻左！真係好感恩！求仁得仁！我一定會好錫好錫呢個寶貝仔！雖然果一刻我仲懷疑會唔會有0.X%出錯呢？會唔會照結構果時先發現原來係女呢？

由於性別已知，我就即刻上左車仔個網揀左堆減價既BB仔衫！由於唔識睇SIZE，所以乜都揀左最大SIZE黎買，哈哈！

2015年7月2日：12w5 初期結構

因為睇左親子王國同埋阿澤介紹，我決定左去中環劉子建醫生度做NIFTY！雖然好貴，不過買個安心都好呀。

果日我以為齋抽血，所以單拖去啦，點知抽完血之後（仲要係醫生親先抽），竟然有得係超聲波睇BB！原來做NIFTY係包埋初期結構！醫生照得超詳細，原來佢D器官已經好齊全，佢一路都有同我解釋呢個係心臟呀手指呀。照照下，醫生問我：你想唔想知性別呀？我問：下？乜咁快睇得到？醫生話：唔係100%準囉，你想唔想知？我話：都好呀！醫生輕輕彈一句：應該係仔黎呀。嘩，呢一句簡直舉足輕重，由未有B好耐之前我已經知老公（仲係男朋友）好恨仔。我半信半疑問：點睇到嫁？醫生就指左疑似JJ既物體我睇，我睇到之後心諗：嘩！咁大抽？我再問：會唔會係其他部位，好似臍帶果D黎嫁？係咪準嫁？（而家諗返起呢個問題真係侮辱左呢位咁出名既醫生）醫生話：都七八成準，都十二週啦，應該唔會錯！（之後佢係睇得岩的，真係好犀利）之後醫生都讚：暫時BB所有野都好靚禾！我好開心，因為我其實都無乜注意過飲食呀果D，最後醫生PRINT左一大堆超聲波相俾我，我約埋結構日期就走喇！

因為今日拎左成日假，為左獎勵自己，我即刻去左中環嘆個咖啡！不過我無同老公講究竟係仔定女，我係諗住等埋NIFTY個REPORT先講。其實我係唔敢講，廢事到時詐糊，佢一定會空歡喜一場！所以老公一路都以為係女，由佢慢慢以為啦，哈哈！

2015年5月25日：7w2 健康飲食

自從知道有左之後，上網搵左好多資料應該食D乜對BB最好！
今日早餐：牛奶，烚蛋，士多啤梨
今日晚餐：蒸豆腐，白菜仔，茄汁豬扒，檸檬汁三文魚 (老公煮)

好飽啊！唔知BB鍾唔鍾意呢？

2015年5月18日：6w2 驗孕

M遲左10日，加上胸脹痛得好犀利，老公估我可能中獎，本身我都唔信，覺得邊有咁易，不過又真係感覺唔尋常，所以前一晚就買定支驗孕棒。

一早起身就驗，雖然條線好淺色，不過應該中左！即刻whatsapp老公，不過佢好似無咩反應，哈哈！

之後問左朋友要點做，就即刻去附近診所驗多次拎張證明書，再去東區登記產檢！