一早首先去左牙醫度換鐵線，我決定生左先至諗再拔埋下排兩隻牙。醫生都理解，所以生之前，佢都話只會幫我洗下牙，繼續換鐵線，唔搞movement。
下午三點幾，搵埋老公去劉子建醫生度，上到去等左陣就入醫生房喇！同上次一樣，劉醫生好溫柔，問我呢排點呀，又講返nifty個報告係低危，又提返我bb係仔定女呀？有無感受到胎動呀？我答返有，因為由18-19週開始，我已經感覺到個肚彈下彈下，我好肯定呢d就係胎動啦！
講返照結構，醫生一開波已經搵到Bach仔大脾中間條大啫啫！哈哈哈！
之後一路逐個部位照，醫生照得好熟手，解釋得好詳細，每個部位都肯定我都見到先照下一樣。雖然有些部分其實我只係睇到一舊野，不過我都好信任醫生！期間都一路有幫bb check size，其實都好犀利，我無咩食特別野，size都全部正常！最開心就係醫生開左4d照Bach仔個樣俾我睇！好清！cap左兩張，Bach仔已經郁來郁去，郁到想cap多張都唔得！不過第一次可以見到Bach仔個樣，我已經非常開心！！我仲即時望下老公，佢傻更更咁望住個mon，但我知佢同我一樣，都係好開心的！
一路照，姑娘一路睇住checklist睇下有無漏。最後劉醫生話暫時咁睇都未發現到有問題，所有野都算正常！不過話始終只係超聲波，都有些限制，我都明白的！點都好，聽到已經安心左好多！
